Pacolli: Bashkësia ndërkombëtare ta detyrojë Serbinë të merret me të kaluarën ose rrezikojmë një rishkrim të historisë

Kryetari i Aleanca Kosova e Re, Behgjet Pacolli, ka kërkuar që bashkësia ndërkombëtare ta detyrojë Beogradin të ndërmarrë veprime dhe të merret me të kaluarën, përndryshe sipas tij, rrezikojmë një rishkrim të historisë së Kosovës.

Përmes një shkrimi në Facebook, ai ka thënë se mos-ndëshkueshmëria ndaj Serbisë duhet të përfundojë, por edhe sistemi kosovar i drejtësisë duhet të dalë nga gjumi dimëror për të sjellë para drejtësisë kriminelët e luftës.

“Dokumentet e publikuara nga RTK për fatin e Prof. Ukshin Hotit janë të tmerrshme dhe tregojnë një krim të orkestruar nga Beogradi. Prokuroria e Kosovës dhe bashkësisë ndërkombëtare të ndërmarrin veprime dhe të sjellin para drejtësisë autorët e krimit të kryer kundër Ukshin Hotit dhe mijëra krimeve të tjera. Mos-ndëshkueshmeria ndaj Serbisë duhet të përfundojë por edhe sistemi jonë i drejtësisë duhet të dalë nga gjumi dimëror për të sjellë para drejtësisë kriminelët e luftës”.

“Para një viti ne i sollëm mijëra faqe dëshmi dhe prova për krimet serbe, Prokurorisë speciale, dhe shpresojmë që çdo faqe të merret në konsideratë”.

“Nga ana tjetër Bashkësia ndërkombëtare duhet ta detyrojë Beogradin të ndërmarrë veprime dhe të merret me të kaluarën, përndryshe rrezikojmë një rishkrim të historisë së Kosovës”, ka shkruar Pacolli.

Lidhur me dokumentet e publikuara  në televizionin publik,  për fatin e Prof. Ukshin Hotit, pati reagime edhe nga presidenti Hashim Thaçi e nga shoqëria civile.

The post Pacolli: Bashkësia ndërkombëtare ta detyrojë Serbinë të merret me të kaluarën ose rrezikojmë një rishkrim të historisë appeared first on Telegrafi.


Burimi: telegrafi.com